ULCINJ: Sezona na Velikoj plaži pod znakom pitanja zbog arapskog zakupa – Cijene su gotovo pet puta veće nego ranije
Ulcinj – Iako je ljetna sezona pred vratima, na Velikoj plaži u Ulcinju i dalje vlada neizvjesnost. Bivši zakupci kupališta još uvijek pregovaraju s novim koncesionarom – kompanijom “Eagle Hills”, koju predvodi poznati investitor iz Ujedinjenih Arapskih Emirata, Mohamed Alabar. Kako su izjavili za medije, očekuju da će dogovor o ustupanju devet plaža biti postignut do kraja mjeseca.
Jedan od bivših zakupaca, Albert Kastrati, istakao je u jutarnjem programu TV Vijesti da već ozbiljno kasne s pripremama, što može imati negativan uticaj na čitavu sezonu.
„Ukoliko se dogovor uskoro ne postigne, pitanje je da li ćemo moći kvalitetno pripremiti plaže i dočekati turiste kako dolikuje. A sve to se već osjeća – Velika plaža je gotovo prazna nakon praznika“, upozorava Kastrati.
Osim organizacionih problema, zakupce pogađa i drastično povećanje cijena zakupa koje je, prema riječima Kastratija, gotovo pet puta više nego prethodnih godina.
„Cijene zakupa su gotovo pet puta veće nego ranije.Naši gosti su većinom iz regiona, gdje su platežne mogućnosti ograničene. Ako budemo primorani da povećamo cijene usluga, rizikujemo da izgubimo i ono malo turista što su planirali da dođu“, kazao je on.
Uprkos svemu, zakupci poručuju da će učiniti sve da gostima pruže kvalitetnu uslugu.
„Pozivamo sve goste da dođu, da se uvjere da su i dalje dobrodošli. Mi ćemo dati sve od sebe da ih dočekamo srdačno, kao i prethodnih godina – ako ne i bolje“, zaključuje Kastrati.
